कन्हैयालाल सेठिया (1919-2008)

( विरल ही किसी कवि के गीत को वह मान्यता मिलती है जिसके तहत एक पूरा का पूरा जन-समुदाय  उसे अपनी अस्मिता — अपनी पहचान — से जोड़कर देखने लगे . राजस्थानी और हिंदी के सुप्रसिद्ध कवि कन्हैयालाल सेठिया का यह गीत ऐसा ही एक कालजयी गीत है .  अगर इसे  राजस्थानी उप-राष्ट्रीयता का अघोषित राष्ट्रगीत कहा जाए तो अनुचित न होगा .  आप भी इसे   पढ़ें-सुनें और आनन्दित हों  )

धरती धोरां री !

 

धरती धोरां री !

आ तो सुरगां नै सरमावै
ईं पर देव रमण नै आवै
ईं रो जस नर नारी गावै
               धरती धोरां री !

सूरज कण कण नै चमकावै
चन्दो इमरत रस     बरसावै
तारा निछरावल कर   ज्यावै
                  धरती धोरां री !

काळा बादलिया घहरावै
बिरखा घूघरिया घमकावै
बिजली डरती ओला खावै
                धरती धोरां री !

लुळ लुळ बाजरियो लैरावै
मक्की झालो दे’र बुलावै
कुदरत दोन्यूं हाथ लुटावै
              धरती धोरां री !

पंछी मधरा मधरा    बोलै
मिसरी मीठै सुर स्यूं घोलै
झीणूं बायरियो     पंपोळै
                 धरती धोरां री !

नारा नागौरी हिद    ताता
मदुआ ऊंट अणूंता खाथा !
ईं रै    घोड़ां री     के बातां ?
                  धरती धोरां री !

ईं रा फल फुलड़ा मन भावण
ईं रै    धीणो     आंगण आंगण
बाजै सगळां स्यूं   बड़ भागण
                      धरती धोरां री !

ईं रो    चित्तौड़ो गढ़    लूंठो
ओ तो रण वीरां रो खूंटो
ईं  रो    जोधाणूं     नौ कूंटो
              धरती धोरां री !

आबू    आभै रै    परवाणै
लूणी    गंगाजी ही जाणै
ऊभो जयसलमेर सिंवाणै
               धरती धोरां री !

ईं रो    बीकाणूं     गरबीलो
ईं रो अलवर जबर हठीलो
ईं रो   अजयमेर    भड़कीलो
                 धरती धोरां री !

जैपर नगरयां में पटराणी,
कोटा बूंटी कद अणजाणी ?
चम्बल कैवै   आं री का’णी
                 धरती धोरां री !

कोनी नांव भरतपुर छोटो
घूम्यो सुरजमल रो   घोटो
खाई    मात फिरंगी   मोटो
              धरती धोरां री !

ईं स्यूं नहीं माळवो न्यारो
मोबी   हरियाणो है     प्यारो
मिलतो तीन्यां रो उणियारो
                  धरती धोरां री !

ईडर पालनपुर   है    ईं रा
सागी जामण जाया बीरा
ऐ तो टुकड़ा मरू रै जी रा
                धरती धोरां री !

सोरठ बंध्यो सोरठां लारै
भेळप सिंध आप    हंकारै
मूमल बिसरयो हेत चितारै
                  धरती धोरां री !

ईं पर तनड़ो मनड़ो वारां
ईं पर जीवण प्राण उवारां
ईं री धजा उडै गिगनारां
              धरती धोरां री !

ईं नै मोत्यां थाल बधावां
ईं री धूल लिलाड़ लगावां
ईं रो    मोटो भाग    सरावां
                धरती धोरां री !

ईं रै सत री आण निभावां
ईं रै    पत नै नहीं    लजावां
ईं नै     माथो भेंट     चढ़ावां
                  मायड़ कोड़ां री
                धरती धोरां री !

*****

इस गीत को सुनने के लिए क्लिक करें :   धरती धोरां री ………